ធនាគារ ABA ទទួលបានពានរង្វាន់ Elite Quality Recognition Awards ពី JP Morgan សម្រាប់ប្រតិ...

26/Sep/2024

ABA ដែលជាធនាគារពាណិជ្ជធំបំផុត¹ និងជាគ្រឹះស្ថានផ្តល់សេវាហិរញ្ញវត្ថុឌីជីថលឈានមុខនកម្ពុជា ទទួលបានពានរង្វាន់ ទទួលស្គាល់គុណភាពឧត្តមប្រចាំឆ្នាំ 2022 និង ឆ្នាំ 2023 (Elite Quality Recognition Awards) ពី JP Morgan ដែលជាគ្រឹះស្ថានហិរញ្ញវត្ថុធំបំផុតមួយលំដាបពិភពលោក។

ពានរង្វាន់ដ៏មានកិត្យានុភាពទាំងនេះ បានទទួលស្គាល់អំពីសមត្ថភាពរបស់ ABA លើការគ្រប់គ្រងប្រតិបត្តិការផ្ទេរប្រាក់ប្រកបដោយគុណភាពខ្ពស់ និងសមិទ្ធផលរបស់ខ្លួនដែលសម្រេចបាននូវចំណាត់ថ្នាក់ ស្ដង់ដារប្រតិបត្តិការប្រព័ន្ធដំណើរការឆ្លងកាត់ត្រង់ផ្ទាល់ (STP rate ) ក្នុងកម្រិត 99.84% ក្នុងឆ្នាំ 2023 និង 99.86% ក្នុងឆ្នាំ2024 ក្នុងការដំណើរការផ្ទេរប្រាក់ក្រៅប្រទេស និងការទូទាត់ពាណិជ្ជកម្មជាប្រាក់ដុល្លារ។

នៅថ្ងៃទី25 ខែកញ្ញា ឆ្នាំ 2024 តំណាងរបស់ JP Morgan ប្រចាំតំបនឥណ្ឌូចិនបានប្រគល់ Certificate for the Outstanding Achievement of the Best-in-Class MT103 STP Rate 99.84% និង 99.86% ជូនដល់ធនាគារ ABA នៅការិយាល័យកណ្តាលរបស់ធនាគារ។

ក្នុងជំនួបជាមួយ JP Morgan លោក Zhiger Atchabarov នាយកប្រតិបត្តិការនៃធនាគារ ABA បានមានប្រសាសន៍ថា “វាពិតជាកិត្តិយសបំផុតរបស់យើងខ្ញុំ ដែលទទួលបានពានរង្វាន់ពី JP Morgan ប្រាំឆ្នាំជាប់ៗគ្នា។ ពានរង្វាន់នេះ បានឆ្លុះបញ្ចាំងពីសេវាកម្មផ្ទេរប្រាក់ដ៏ឥតខ្ចោះរបស់ធនាគារ ដោយធានាថា រាល់ប្រតិបត្តិការសម្រាប់អតិថិជនរបស់ពួកយើង ដំណើរការដោយ សុក្រឹត និងសុវត្ថិភាព។”

លោក Zhiger ក៏បានបន្ថែមថា “នៅពេលដែលយើងបន្តពង្រឹងសេវាហិរញ្ញវត្ថុរបស់យើងខ្ញុំ ជូនអតិថិជន មិនថាជារូបវន្ដបុគ្គល ឬស្ថាប័ន យើងខ្ញុំតែងតែផ្តោតលើឧត្តមភាពនៃប្រតិបត្តិការ ជាពិសេសទៅលើសេវាកម្មទូទាត់តាមអេឡិកត្រូនិក។ តាមរយៈការអនុវត្តស្តង់ដារប្រសិទ្ធភាពកម្រិតខ្ពស់ យើងខ្ញុំមានគោលបំណងកាត់បន្ថយដំណើរការធ្វើឡើងដោយដៃ ដោយធានានូវគុណភាពប្រតិបត្តិការយ៉ាងរលូន និងលុបចោលនូវភាពយឹតយ៉ាងនៃការទូទាត់។”

លោកស្រី Hooiching Wong នាយិកាគ្រប់គ្រង ប្រធានផ្នែកលក់ FIG អាស៊ាន និងជាមន្ត្រីជាន់ខ្ពស់ប្រចាំប្រទេសម៉ាឡេស៊ី របស់ JP Morgan បានមានប្រសាសន៍ថា “ឧត្តមភាពឆ្នើមរបស់ ABA គឺពិតជាគួរឲ្យស្ញប់ស្ញែង។ ABA បន្ដសម្រេចបាននូវ STP rate ដ៏ល្អប្រសើរគួរឲ្យកត់ សម្គាល់ចាប់ពី 99.56% ក្នុងឆ្នាំ 2020 រហូតដល់ 99.86% ក្នុងឆ្នាំ 2024។ សមត្ថភាពក្នុងការរក្សាបាននូវស្ថិរភាពកំណើន និងសម្រេចលើសកម្រិត ស្តង់ដារ ពីមួយឆ្នាំទៅមួយឆ្នាំ ពិតជាគួរឲ្យស្ងើចសរសើរ។

លោកស្រីបានបន្ដថា “ដោយសម្លឹងឆ្ពោះទៅមុខ យើងខ្ញុំជឿជាក់ថាភាពជាដៃគូរវាង ABA និង JP Morgan នឹងបន្តរីកចម្រើន និងវិវត្តន៍ទៅមុខប្រកបដោយផ្លែផ្កា ដោយមានឱកាសល្អៗជាច្រើននាថ្ងៃអនាគត ដែលយើងអាចស្វែងយល់ និងពិភាក្សាបាន។”

យន្តការ STP ផ្តល់សេវាកម្មហិរញ្ញវត្ថុដែលមានអត្ថប្រយោជន៍ខ្ពស់ រួមមានជាអាទិ៍ ដំណើរការផ្ទេរប្រាក់លឿន កាត់បន្ថយហានិភ័យទូទាត់ កំហុសអប្បបរមា ជំរុញប្រសិទ្ធភាពប្រតិបត្តិការរបស់ធនាគារ និងកាត់បន្ថយការចំណាយប្រតិបត្តិ្កការ។ ធនាគារ ABA បានអនុវត្តលើសពីស្តង់ដារប្រតិបត្តិការ និងជាប់ចំណាត់ថ្នាក់ខ្ពស់សម្រាប់ពានរង្វាន់ដែលទទួលស្គាល់ថា ស្ទើរតែ ប្រតិបត្តិការទាំងអស់របស់ធនាគារ មិនមានបញ្ហាផ្នែកកំហុសដំណើរការ ជាមួយនឹងប្រតិបត្តិការត្រឡប់ និងការបដិសេធស្ថិតក្នុងកម្រិតទាបបំផុត។

ការទទួលបានពានរង្វាន់ប្រាំឆ្នាំជាប់ៗគ្នានេះ ពង្រឹងជំហររបស់ ABA ជាធនាគារដំបូង និងតែមួយគត់នៅកម្ពុជា ដែលទទួលបានពានរង្វាន់នេះពី JP Morgan ដោយឆ្លុះបញ្ជាំងពីតួនាទីដ៏លេចធ្លោរបស់ធនាគារក្នុងការសម្របសម្រួលប្រតិបត្តិការទូទាត់ឆ្លងប្រទេស។

_{¹ ABA ជាធនាគារពាណិជ្ជកម្ពុជាដ៏ធំបំផុតគិតលើទ្រព្យសកម្ម, ប្រាក់បញ្ញើ, កម្ចីដុល, ប្រាក់បញ្ញើអតិថិជន និងប្រាក់ចំណេញ ផ្អែកលើរបាយការណ៍ត្រួតពិនិត្យរបស់ធនាគារជាតិនៃកម្ពុជាប្រចាំឆ្នាំ 2021-2023 ។}