ធនាគារ ABA បង្កើនលទ្ធភាពទទួលបានហិរញ្ញប្បទានសម្រាប់ពាណិជ្ជកម្ម សហគ្រាសធុនតូច និងមធ្យមសម្រាប់កម្ពុជា និងសិង្ហបុរី តាមរយៈ គម្រោងថ្នាលច្រករបៀងតម្លាភាពហិរញ្ញវត្ថុ (FTC)
20/Jun/2024
ធនាគារ ABA ដែលជាធនាគារពាណិជ្ជធំបំផុតនៅកម្ពុជា1 មានមោទនភាពបានចូលរួមសហការក្នុង គម្រោងថ្នាលច្រករបៀងតម្លាភាពហិរញ្ញវត្ថុ (Financial Transparency Corridor-FTC)។ គម្រោងនេះ ផ្ដល់ជូននូវហេដ្ឋារចនាសម្ព័ន្ធឌីជីថល ដែលមានសុវត្ថិភាព និងមានមូលដ្ឋានលើការយល់ព្រម ដើម្បីសម្របសម្រួលហិរញ្ញវត្ថុពាណិជ្ជកម្ម និង សេវាផ្សេងៗសម្រាប់សហគ្រាសធុនតូច និងមធ្យម (SMEs) ។
គម្រោងថ្នាល FTC នេះ បានបង្កើតឡើងដោយ ធនាគារជាតិនៃកម្ពុជា និងអាជ្ញាធររូបិយវត្ថុសិង្ហបុរី ក្នុងគោលបំណងបង្កើនលទ្ធភាពទទួលបានហិរញ្ញប្បទានឆ្លងដែនទ្វេភាគី សម្រាប់សហគ្រាសធុនតូច និងមធ្យម (SMEs) រវាងប្រទេសទាំងពីរ។
ព្រឹត្តិការណ៍ដាក់ដំណើរការជាផ្លូវការនៃ គម្រោងថ្នាល FTC នេះ ធ្វើឡើងនៅថ្ងៃទី១៩ ខែមិថុនា ឆ្នាំ ២០២៤ ក្នុងប្រទេសសិង្ហបុរី ក្រោមអធិបតីភាព សម្តេច ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លោក ឡរ៉ែន វង់ នាយករដ្ឋមន្ត្រីសាធារណរដ្ឋសិង្ហបុរី លោកស្រី ជា សិរី ទេសាភិបាល ធនាគារជាតិនៃកម្ពុជា និង លោក ជៀ ដឺ ចាយអិន នាយកគ្រប់គ្រងអាជ្ញាធររូបិយវត្ថុសិង្ហបុរី។
ការផ្តួចផ្តើមថ្មីនេះ បង្កើនលទ្ធភាពទទួលបានហិរញ្ញប្បទាន សម្រាប់អាជីវកម្មកាន់តែប្រសើរ និងផ្តល់បណ្តាញអតិថិជនកាន់តែទូលំទូលាយ ព្រមទាំងពង្រឹងដំណើរការពាណិជ្ជកម្មឆ្លងដែន។ លើសពីនេះទៀត គម្រោងថ្នាលនេះអនុញ្ញាតឲ្យធនាគារសមាជិកទាំងពីរប្រទេស ចែករំលែកទិន្នន័យដោយសុវត្ថិភាព និងផ្តល់ភាពងាយស្រួលសម្រាប់អាជីវកម្មក្នុងការទទួលបានហិរញ្ញប្បទានសម្រាប់ពាណិជ្ជកម្មឆ្លងព្រំដែនរបស់ពួកគេ។
លោក Askhat Azhikhanov នាយកប្រតិបត្តិនៃធនាគារ ABA បានមានប្រសាសន៍ថា “ធនាគារ ABA មានសេចក្តីសោមនស្ស ក្នុងការសហការក្នុងគម្រោង ថ្នាលច្រករបៀងតម្លាភាពហិរញ្ញវត្ថុ (Financial Transparency Corridor-FTC), ដែលពង្រឹងកិច្ចសហប្រតិបត្តិការ រវាង ស្ថាប័នហិរញ្ញវត្ថុនៅកម្ពុជា និង សិង្ហបុរី ដោយគាំទ្រ សហគ្រាសធុនតូច និងមធ្យម (SMEs) ក្នុងស្រុកកាន់តែប្រសើរ និងមានប្រសិទ្ធភាព។”
លោកក៏បានបន្ថែមថា “យើងមានមោទនភាពក្នុងការគាំទ្រ ការផ្តួចផ្តើមនេះ ដែលបង្កើនពាណិជ្ជកម្មឆ្លងព្រំដែន និងផ្តល់សេវាធនាគារ ឲ្យ បានល្អប្រសើរសម្រាប់អតិថិជនរបស់យើង។ គម្រោងថ្នាល FTC ថ្មីនេះ នឹងបង្កើត ឱកាសអាជីវកម្មថ្មីបន្ថែមទៀត សម្រាប់អាជីវកម្មក្នុងប្រទេសសិង្ហបុរី និង កម្ពុជា” ។
គម្រោងថ្នាល FTC ថ្មី នេះ គូសបញ្ជាក់ពីការប្តេជ្ញាចិត្ត ដែលកម្ពុជា និង សិង្ហបុរី កំពុងបន្តក្នុងការលើកកម្ពស់ការចូលរួម ផ្នែកហិរញ្ញវត្ថុ ជួយសម្រួលដល់ទីផ្សារពាណិជ្ជកម្ម និងសម្រេចបាននូវកំណើនសេដ្ឋកិច្ចប្រកបដោយចីរភាព។ ការ ចូលរួម របស់ ធនាគារ ABA គឺជាជំហានដ៏សំខាន់មួយឆ្ពោះទៅរកគោលដៅរួម និងផ្តល់ឱកាសដល់ សហគ្រាសធុនតូច និងមធ្យម(SMEs) រីកដុះដាល និងរីកចម្រើននៅក្នុងទីផ្សារសកល។
1ABA គឺជាធនាគារពាណិជ្ជធំបំផុតនៅកម្ពុជា ដោយគិតលើទ្រព្យសកម្មសរុប, កម្ចីដុល, ប្រាក់បញ្ញើអតិថិជន និងប្រាក់ចំណេញ ផ្អែកលើរបាយការណ៍ត្រួត ពិនិត្យប្រចាំឆ្នាំ 2021-2023 របស់ធនាគារជាតិនៃកម្ពុជា។